Eit eige rom med utsikt

Kanskje treng ein faktisk eit eige rom for å verkeleg kunne skrive. Særleg om ein er i eit hus med fleire andre. Eit rom å setje seg ned i, ved eit gammalt bord ein har drege ned frå låven, ved eit vindauge med utsikt oppover markene. Eit rom med gode kjensler, eit rom besteforeldra dine låg i, eit rom med gammaldags tapet og brurebilete i svart-kvitt. Eit rom med skråtak og potteplantar, jesusbilete, blondegardiner og ro. Eit rom sola skin inn i, og varmar, eit rom som luktar av gras gjennom glipa i vindauget.