Marknadsplanlegging

I går fekk eg e-post frå marknadskonsulenten for skjønnlitteratur i Samlaget. Nokre av dykk bokbloggarar har nok høyrt frå henne før, i samband med siste boka til Edmund Austigard, som fleire av oss las og omtalte.

Marknadsavdelinga vil at eg skal kome med innspel til stader der eg trur det kan vere muleg å marknadsføre boka, og som ivrig litteraturbloggar, tenkte eg sjølvsagt på mine medbloggarar som les og skriv om bøker. Eg har difor gitt nokre namn vidare, men eg håper ingen kjenner seg forplikta verken til å ta imot, lese eller gi ein omtale - god eller dårleg. Eg håper heller ikkje at nokon kjenner seg utelatt. Dersom du er ein litteraturbloggar som har lyst til å få eit gratis leseeksemplar av boka mi når ho kjem til hausten og trur du ikkje står på lista, kan du jo gi meg eit vink, så skal eg få sett deg også opp med det same.