Litterær Sjølvmelding

Ettersom dette har vorte ein ny farsott i Blåggarverda, skal også eg hive meg på bølga og kreere mi eiga litterære sjølvmelding. For lesarar som er interesserte i andre enn mine, sjekk ut Gollowitz´ verden og blåggen http://avalidland.blogspot.com

1. Kor mange bøker eig du?
Ettersom eg nyleg har flytta til Frogner, Oslo, er mi nyvunne Frognerske Bokhylle kraftig begrensa samanlikna med mi Trondhjemske. Dersom eg skal telle med alle bøkene i Oslo og i Min Barndoms Heim, vil eg derimot kome oppi ei rundt rekna 400-500 bøker.

2. Kva for ei bok var den siste du kjøpte?
Då eg sist handla bøker kjøpte eg to bøker i Mao samtidig, nemleg Virginia Woolfs "Flush", ein lettlest og underhaldande biografi om ein liten Cocker Spaniel, og Iain Pears´ (som forøvrig er ein av mine yndlingsforfattarar) kriminalroman "Death and Restoration".

3. Kva for ei bok var den siste du las?
Den siste boka eg las var den fabelaktige Kurt Austs siste roman om Thomas Boueberge og Petter Hortten, nemleg den historiske kriminalromanen "Nest etter Gud. Kongefrykt", som eg på det varmaste vil anbefale saman med hans øvrige bøker. Eg held elles på med tre bøker pr i dag, nemleg Harry Potter "The Half-Blood Prince", Virginia Woolf "Flush" og Isabel Allende "En lykkens datter" (som har ligge på hylla i nokre månader, diverre).

4. Nemn tre bøker som har betydd mykje for deg og som du har lest meir enn tre gongar?
Sidan eg er Ei Som Les Bøker Fleire Gongar, må eg på dette spørsmålet tenke meg nøye om. Som barn las eg alle bøker som gjorde inntrykk på meg, meir enn tre gongar. Men ettersom eg må velge, vil eg her trekke fram dei tre første bøkene i serien om Anne fra Bjørkely av L.M. Montgomery, som har gitt meg mykje glede oppigjennom åra.
Eg har, ettersom eg er ein Stor Agatha Christie-fan, også lest hennar bøker fleire gongar, men då det blir vanskeleg å velge ut ei spesiell, vil eg hoppe vidare til ein av dei Store Bøkene i min ungdom; nemleg "Beatles" av Lars Saabye Christensen, som eg til stadigheit påstår at ein aldri blir for gammal til å lese.
Den siste boka eg vil nemne her, er ei av mine første verkeleg store litterære opplevingar, og som framleis står som ein av mine favorittromanar, nemleg "Sangen om den røde rubin" av Agnar Mykle.

5. På spørsmål nr 5 ønskar eg å avvike frå den opprinnelege sjølvmeldinga og legge til eit spørsmål for eiga rekning, nemleg:
Kva bok eller bøker lengtar du etter å lese, og vil du forsøke å lese så snart som muleg?
For eigen del er svaret enkelt: Eg lengtar etter å få lese "Jonathan Strange & Mr. Norrell" av Susannah Clarke, etter sigande "Harry Potter for vaksne" (akkurat som om Harry Potter ikkje også er for vaksne), som altså handlar om magikarar under Napoleonskrigane i England. Morosamt. Eg ser også fram til å få lese den tidlegare nemnte Iain Pears-boka.

Til slutt oppfordrar eg alle mine lesarar som også er blåggarar om å føye denne litterære sjølvmeldinga til sin eigen blågg, då det er svært morosamt å sjå kva andre har å seie om sitt eige litterære liv.

Les godt!